Marisma

Una marisma^[1] ye una zona humida, por un regular cercana a la mar, de gran riqueza en fauna y flora. Estas zonas humidas a sobén son estacions de paso en a migración d'as aus entre o norte d'Europa y Africa.

Ye un terreno baixo y paulenco, con aportes d'augua subterrania, fluvial y de mareas.

As marismas han sufrito a presión urbanistica, en especial en o País Valenciano, con periglo que desapareixcan, destancando como pervivencias a marisma del Moro, a marisma de Pego-Oliva y a marisma de Peniscola.

Como peix tipico d'as marisma tenemos o zamaruco.

Etimolochía

Huei a palabra marisma s'aplica a zonas humidas d'a costa levantina, pero en o pasau s'emplegaba pa zonas humidas d'a Ribera d'Ebro. D'antis mas existiba o termin almarchal, d'orichen arabe, que vien d'a palabra march que significa prau estando un caso d'adaptación d'a letra chim como ch en aragonés. Antes s'emplegaba en a Ribera Navarra, y Riberas Alta, Baixa d'Ebro y Sistema Iberico con o significau de paúl u terreno paulenco, pero ha quedau fosilizau en a toponimia, de fueras d'a cuenca de Millars, a on que encara se fa servir a variant armachal^[2]. Bi ha bella mención medieval que proviene de Tudela, (1256, 1260, 1279: Almalchal, Almargale, Almarial), Alagón (1195) y Zaragoza (1158, 1191 y 1194):

lo campo qui es prope lo almagar (documentos d'o Pilar).

uendimus illos nostros campos quos abemus in termino de almarxhal (documentos d'o Pilar).

et illo almarial de illa villa cecidit inde a don Artal illam medietatem apud Cesauraugustam. Alagón 1195

En a toponimia a vegadas bi ha cambio de -l por -n, y d'astí formas como marján u marjanes.

Referencias

↑ (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).
↑ (es) Manuel Alvar: Atlas lingüístico y etnográfico de Aragón, Navarra y Rioja. Tomo X. Institución Fernando el Católico. Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983. Mapas nº 1388 terreno pantanoso.

Bibliografía

(es) Juan A. Frago Gracia: Toponimia navarroaragonesa del Ebro (V) yermos y pastizales. Archivo de filología aragonesa XXXVIII. 1986.

Cuerpos d'augua continental

Corrient	Arrigacho · Galocha · Río · Torrent (Barranco · Garona · Rambla)
Aturada	Laco · Lacuna u Estanyo (albufera · ibón · salada) · Paúl · Marisma · Basa

Datos: Q55706997

[DACC-1] (an) Diccionario aragonés-castellano-catalán. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024 (accesible vía web).

[2] (es) Manuel Alvar: Atlas lingüístico y etnográfico de Aragón, Navarra y Rioja. Tomo X. Institución Fernando el Católico. Departamento de Geografía Lingüística, Institución Fernando el Católico de la Excma. Diputación Provincial de Zaragoza, 1983. Mapas nº 1388 terreno pantanoso.

[1]

[2]