Operazion Ataman

La Operazion Ataman e je stade la ocupazion dal Alt Friûl di bande des trupis cosachis (e des lôr fameis) incuadradis te Wehrmarcht te suaze dal consolidament de Zone des Operazions dal Litorâl Adriatic.

Trupis di cosacs in Cjargne

Storie

Dulinvie pe istât dal 1944 tal Alt Friûl e jerin une vore di operazions partigjanis, che culminarin il 26 di Setembar di chel an cun la proclamazion de Republiche partigjane de Cjargne.

Par chest motîf tal mês di Lui dal 1944 il Comandant Superiôr des SS e de polizie di Triest, Odilo Globočnik, al concuardà l'insediament des trupis cosachis te zone: al tacà cussì la Operazion Ataman, che, in cualchi setemane, al trasferì cirche 22 000 cosacs (9.000 soldâts, 6.000 "vecjos", 4.000 "familiârs" e 3.000 "fruts"), e 4.000 "caucasics" (2.000 soldâts e antants familiârs) su di 50 trens marcjanziis militârs.

Sconfite tal mês di Otubar la zone libere di Cjargne di bande des fuarcis nazifassistis, i cosacs a tacarin la costituzion de Kosakenland in Norditalien (Tiere cosache te Italie dal Nord) promitude dai todescs, replicant tai paîs furlans la lôr organizazion sociâl, stîi di vite e cerimoniis religjosis. Il comun di Verzegnis al divignì la sede dal cjâf sovran des fuarcis cosachis, l'ataman Pëtr Nikolaevič Krasnov, intant che diviers altris paîs a forin ribatiâts cun nons di citâts russis (Dalès e fo cambiade in Novočerkassk, Trasaghis in Novorossijsk, Cjavaç in Krasnodar). Tumieç e fo la sede dal Consei Cosac.

Cun l'avanzade aleade in Italie, i Cosacs de Cjargne a iniziarin la dramatiche ritirade traviers dal Pas di Mont di Crôs bande la Austrie, dulà che i 9 di Mai dal 1945 a si rinderin aes trupis britanichis dongje di Lienz e pe parte plui grande a forin consegnâts ai sovietics, che ju deportarin tai gulags dulà che, secont lis stimis, a soreviverin dome metât di lôr.