numerus

Numerus (čisło) je gramatiska forma, kotraž słuži postajenju respektiwnje rozeznawanju mnóstwa. Wona wobwliwuje w najwjace indoeuropskich rěčach wšelake družiny słowow, tak substantiwy, adjektiwy, werby, pronomeny a dalše.

Wjetšina indoeuropskich rěčow ma dwaj numerusaj, mjenujcy singular a plural, mjeztym zo je dual zwjetša wotstronjeny. Indoeuropskej rěči z wobchowanym dospołnym dualom stej serbšćina a słowjenšćina. W druhich słowjanskich rěčach su so relikty tutoho numerusa zdźerželi.

Dalše numerusy su paral (za objekty, kotrež wustupuja přirodnje jako porik), trial (za tři objekty, jara rědki), kwadral (njeje za přirodne rěče dopokazany), pawkal (za małe mnóstwa).

Wjele zwonkaeuropskich rěčow kaž na přikład chinšćina porno tomu numerus jako gramatisku kategoriju njeznaja. Wone zwuraznjeja wšelake mnóstwa přez ličby abo samo wospjetowanje słowa.