Słanknowski wuběžk
Słanknowski wuběžk (čěsce Šluknovský výběžek, němsce Schluckenauer Zipfel abo Böhmisches Niederland) je najsewjerniši region Čěskeje. Leži w sewjernym dźělu Děčínskeho wokrjesa a w sewjerowuchodnym dźělu Wusčanskeho kraja. Namaka so tu najsewjerniši dypk Čěskeje (Buková hora na teritoriju gmejny Lobendawy). kotryž je zdobom morju najbliši (něhdźe 300 kilometrow k Baltiskemu morju).
Słanknowski wuběžk wobdawa z třoch stron teritorij Sakskeje a zdobom ze sewjera hač do wuchoda teritorij Hornjeje Łužicy. Powjerch pokrywaja Łužiske hory (Šluknovská pahorkatina), Łužiske horiny (Lužické hory) a Połobske pěskowčiny (Labské pískovce abo Děčínská vrchovina). Najwyši dypk je hora Jedlová (776 m) a najniši hładźina rěki Křinicy (257 m) při statnej hranicy. K wuznamnym rěkam a rěčkam słušeja Mandawa (přisłuša Baltiskemu morju) abo Křinica, Vilémowska rěčka (Zebnica) a Sprjewja (přisłušeja Sewjernemu morju). Na teritoriju wuběžka trjechi narodny park Čěska Šwica a krajinoškitnej kónčinje Połobske pěskowčiny a Łužiske horiny.
W Słanknowskim wuběžku namaka so dźewjeć městow a dźewjeć gmejnow: Dolní Podluží, Dolní Poustevna, Doubice, Horní Podluží, Chřibská, Jiřetín pod Jedlovou, Jiříkov, Krásná Lípa, Lipová, Lobendawa, Mikławšowicy, Rumburk, Rybniště, Staré Křečany, Słanknow, Velký Šenov, Vilémov a Warnoćicy.
