Theresa Jacobsowa

Theresa Jacobsowa (rodź. Lorencec; * 1980 w Budyšinje) je serbska kulturna wědomostnica.

Wona złoži swoju maturu při Serbskim gymnaziju w Budyšinje a studowaše wot 1999 do 2004 hudźbne wědomosće, germanistiku a komunikaciske a medijowe wědomosće na Lipšćanskej uniwersiće a Jagiellonskej uniwersiće w Krakowje. Po tym bě wědomostna sobudźěłaćerka při Instituće za etnologiju w Lipsku.

Wot 2004 do 2008 absolwowaše promociski studij při Lipšćanskej uniwersiće ze slědźenskim přebytkom w Bratislawje. Jako doktorandka dźěłaše wot 2006 do 2011 při Serbskim instituće a promowowaše 2012 z disertaciju wo serbskej ludowej reji w powědančkach a diskursach w Lipsku. Jacobsowa bě wot 1999 aktiwna jako rejowarka w Lipšćanskim rejowanskim dźiwadle a přewza 2011 jednaćelstwo rejowanskeho archiwa Lipsk.

2015 wróći so Jacobsowa na Serbski institut, hdźež skutkuje jako wědomostna sobudźěłaćerka w kulturnowědnym wotrjedźe. Wot 2021 je wona zastupowaca nawodnica tutoho wotrjada.

Jacobsowa je Maćicarka a čłonka předsydstwa skupiny Serbska reja. Wona je zmandźelena z etnologom Fabianom Jacobsom a ma dwě dźěsći.

Wubrane spisy

• z Fabianom Jacobsom: Vielheiten: Leipziger Studien zu Roma, Zigeuner-Kulturen. Leipziger Universitätsverlag, Lipsk 2011, ISBN 978-3-86583-599-4.
• z Elku Černokožewej a Fabianom Jacobsom: Sorbische Identität und Kultur in der Ortslage Proschim (Prožym) mit Karlsfeld. (= Kleine Reihe des Sorbischen Instituts. Zwjazk 14) Serbski institut, Budyšin 2011, ISBN 978-3-9813244-0-2.
• Der Sorbische Volkstanz in Geschichten und Diskursen. LND, Budyšin 2014, ISBN 978-3-7420-2305-6.
• z Patrickom Primavesi, Juliane Raschel a Michaelom Wehrenom: Tanz in der DDR: Akteure, Formen, Institutionen. Theater der Zeit, Berlin 2015, ISBN 978-3-95749-049-0.
• z Paulom Viebegom: Am Ende wird von mir nur gesammelter Schabernack übrig bleiben: Juro Mětšk – ein Porträt. (= Kleine Reihe des Sorbischen Instituts. Zwjazk 35) Serbski institut, Budyšin 2023, ISBN 978-3-948166-95-3.
• z Anju Pohončowej a Ines Kellerowej: Wědomosć za wšitkich: Maćica Serbska – Maśica Serbska po 1990. (= Kleine Reihe des Sorbischen Instituts. Zwjazk 38) Serbski institut, Budyšin 2024, ISBN 978-3-948166-89-2.

Wotkazy

• Theresa Jacobsowa – Literatura w katalogu Němskeje narodneje biblioteki (němsce)
• Swójska webstrona
• Theresa Jacobsowa na webstronach Serbskeho instituta