Tromma

Hergöngutromma frá þrælastríðinu í Bandaríkjunum.

Tromma er ásláttarhljóðfæri sem framkallar hljóð með hljóðhimnu. Í dæmigerðri trommu er trommuskinn (úr leðri, plasti eða öðrum efnum) strekkt yfir opið á hólklaga grind. Hljóðið er síðan búið til með því að slá á hljóðhimnuna með höndum, trommukjuðum, burstum eða öðrum verkfærum. Önnur aðferð til að fá hljóð úr trommunni er að draga fingur hratt yfir hljóðhimnuna svo hann skoppar. Sumar trommur eru með undirskinn sem þekur botninn á hólknum og hefur mikil áhrif á dýpt og lengd hljóðsins. Trommur eru með elstu og útbreiddustu hljóðfærum heims og hönnun þeirra hefur haldist í megindráttum sú sama í þúsundir ára.

Trommuleikari getur leikið á eina trommu í einu. Til dæmis er alltaf leikið þannig á djembe. Stundum eru fleiri trommur af ólíkri stærð festar saman til að fá fjölbreyttari hljóð, eins og gert er við bongótrommur og pákur. Nútímatrommusett er gert úr nokkrum ólíkum tegundum tromma, auk málmgjalla. Trommur eru oft hluti af stærri hljómsveit þar sem önnur hljóðfæri koma við sögu.

Tegundir

• Bassatromma
• Bongótromma
• Kongótromma
• Páka
• Sneriltromma
• Timbalar
• Tom tom-tromma