Hotel Portofino Kulm

CA	Sta pagina chi a l'é scrita in camugin

Vista de l'hotel, cun l'Hermitage e, ciü inderé, Villa Margherita

L'​Hotel Portofino Kulm o Hotel Portofino Vetta u l'é ün hotel, ancö serou, ch'u se tröva in tu teritoiu du cumüne de Camuggi. St'hotel u l'é stetu custruiu in ta lucalitè dita A Vetta de Portufin, in simma au Munte de Portufin, e u l'é ün'architetüa de güstu liberty ch'a mustra cumme in ta Belle Époque Camuggi e a frasiun da Rüa ean tegnüe in gran cuntu. I feti de guera e e sö dimensciuin han però purtou a serà l'hotel, in seguitu gh'é stetu ciü tentativi de rilancià e fà prumusiun da strutüa.

Storia

A cumensà daa fin de l'Öttusentu, A Rüa a l'ea vegnüa üna destinasiun pe'i türisti ben impurtante e frequentà. In tu detaggiu, u l'é stetu ün agente de bursa de Pariggi, u Sebastiano Gaggini, ch'u l'ha vistu e puscibilitè pe'u türismu de lüssu in te sta lucalitè. Le, ch'u ne vegniva da üna famiggia svissera de Bissone (in sciu lagu de Lügan) che dau Quattrusentu a stava a Zena, u l'ha decizu de fabricà ün gran albergu in sciu Munte (Monte Fino, cumm'u l'ea ditu alantù), in te üna puzisiun panuramica da duve se vedde tantu u Gurfu Paradizu che quellu du Tigülliu. In tu 1904 s'é inandiou i travaggi pe'a stradda ch'a porta daa Rüa au postu de l'hotel, inaugürà in tu meize de dixembre du 1905 doppu 32.000 mine e u travaggiu de 350 ommi au giurnu, pe ün percursu lungu 2.600 metri e largu 7. A ogni moddu, u s'é abandunou u prugettu de andà avanti finn-a in scia Vetta, a 610 metri in sciu livellu du mà.

In ti anni doppu s'é costruiu tütte e strutüe: in tu 1906 u l'é stetu inaugürou u Grand Restaurant, in tu 1907 l'Hotel Hermitage e, in tu 1908, tütte e custrusiuin de servissiu, cumpreizu üna gexetta. Tüttu u cumplessu, inaugürou de mazzu, u l'ha pigiou u numme de Portofino Kulm in unù de l'hotel Rihi Kulm in tu Cantun de Schwyz, duve u Gaggini u gh'andava de spessu. Zà in quell'annu, tra i ospiti de l'hotel gh'é stetu a Reginn-a Margherita de Savoia, che finn-a aa sö morte a l'ha frequentou e lucalitè ciü in vista da Ligüria. Doppu u gh'é pasou l'inventù Guglielmo Marconi, u liricu Giacomo Puccini, a tennista Susanna Lenglen, u spadasin Nedo Nadi, u puliticu Italo Balbo e u pueta e puliticu Gabriele D'Annunzio, ch'u l'ha purtou a cangià u numme da strutüa in te "Portofino Vetta", scicumme ch'u l'ea ascidiou dau "barbaro germanismo Kulm". A ogni moddu, pasou nu guei tempu, in ta strutüa u gh'é stetu propiu di "tedeschi", cumme prexuné de l'armà de l'Austria-Üngheria in ta Grande Guera. I surdatti de l'"Imperiale e Regiu Ezercitu" (K.u.k. Armee / C.e.k. Hadsereg) pe riseive ün megiu tratamentu e quarche munea de ciü s'ean deti a tagià i erbi in ti boschi vixin, pe fane du carbun de legna pe'e gente de Camuggi e de Reccu. Doppu l'hotel u l'é stetu ün üspià militare pe'i ufisiali italien ferii. A strutüa a l'é steta turna averta pe l'ucaxun da Cunferensa de paxe de Zena ch'a s'é tegnüa dau 10 d'arvì au 19 de mazzu du 1922, cun ciü incuntri e cunferense pe'i rapresentanti di 34 stati che se sun tegnüi in scia Vetta de Portufin ascì.

A guera e a morte du Sebastiano Gaggini (cuscì cumme da Reginn-a Margherita, ch'a l'ea steta ün gran prumutù da strutüa) l'han purtou a üna gran crizi. Quelli che vantavan di crediti in tu 1927 l'han dumandou de serà i propi capituli pe 3.157.799 franchi in tüttu. I eredi, missi insemme in te l'Azienda Alberghiera Portofino Vetta, aivan dunque dumandou ün mutuu aa Cascia de Risparmiu de Zena, ch'u l'é stetu aseizu ai 8 de frevà du 1927. Tütti sti puffi han però purtou a asende di atri mutui in tu 1931 fintantu che, ai 16 de mazzu 1932, u Tribünà Civile u l'ha missu a l'incantu i beni da strutüa, che sun steti acatè daa Cascia de Risparmiu.

L'annu doppu a Cascia a l'ha acatou u fundu "La Dolcina", cu'a vivagna ch'a se ghe tröva, e tütti i sciti tra Camuggi e Santa Margaita de prupietè da famiggia Gaggini. A famiggia a l'ha risevüu ünn-a de vilette du cumplessu pe staghe de cà e u dirittu de cögge u pedaggiu pe'a stradda tra A Rüa e A Vetta de Portufin. A ogni moddu, a despetu de üna speiza de quattru miliuin de franchi, mancu a banca a l'ea sciurtia a guagnà dau cumplessu, tantu da vendilu tüttu pe sulu 1.700.000 franchi aa Società Anonima Portofino Vetta du cunte Lorenzo Bruzzo.

Cu'a Segunda Guera Mundiale, a strutüa a l'é steta requizia daa Wehrmacht, ch'a g'ha missu u Cumandu de zona duve gh'ea l'Hotel. Quand'u l'é arivou i Aleè, pe'u ciü cu'i americhen, u cumplessu u l'é stetu cunvertiu in te ün casinò, tantu pe'i civili che pe'i surdatti. Cumme ch'a l'é turnà ae Auturitè civili, a strutüa a l'é steta serà pe de raxuin de urdine pübblicu scicumme, ciü che de reciammu pe persunn-e pocu racumandabili, de votte e gente ean rapinè lungu a via da de bande de mascarsuin.

A strutüa a l'ha cumensou a andà in ruvinn-a, pe cangi de prupietè sensa vegnì mai averta tuttu l'annu e in moddu ch'a funsiunesse ben. In ti anni Setanta a l'é steta acatà dai frè Massone de Camuggi e da l'Orlando Crotti pe faghe üna mustra permanente de pitüe, pe pasà in ti anni Otanta a l'imprezaiu Micheletti e in ti anni Nuvanta aa Fondiaria Assicurazioni du Raul Gardini, ch'u vueiva metighe üna scöa de cuntu pe ommi d'afari. Aa sö morte in tu 1993, a strutüa e a sucietè Portofino Kulm srl sun andete in gestiun ae famigge De Ferrari e De Gregori, prupietaie de l'Alberto Cenobio dei Dogi de Camuggi, ma doppu ün prucessu inandiou in tu 2008 cu'a vegia Fondiaria Sai, poi Unipol, a sentensa du Tribünale de Zena du 2013 a l'ha missu fin au cuntrattu de gestiun ch'u s'ea firmou pe purtà avanti l'hotel.

Aa giurnà d'ancö, doppu de ün acordu firmou in tu 2024 cu'a Unipol, a strutüa a l'é da sucietè Akno de l'imprezaiu Alex Huhi, da cadenn-a de alberghi AN Hotels.

Atri prugetti

Altri progetti

• Wikimedia Commons

• Wikimedia Commons a contêgne di files in sce Hotel Portofino Kulm

Ligammi de föa

• (IT) AN Portofino, in sce an-hotels.com. URL consultòu l'8 lùggio 2026.
• (IT) Struttura alberghiera liberty Portofino Kulm & Kursaal, in sce fondoambiente.it. URL consultòu l'8 lùggio 2026.