The First Salute
E artíkulo aki ta skirbí na ortografia di papiamentu. Lo ta apresiá si por mantené e artíkulo aki na estilo di papiamentu.
| Parti di | American Revolutionary War  |
|---|---|
| Pais | Republika di Shete Provinsia Uni di Hulanda |
| Lokalisá na | Sint Eustatius |
| Koordinato geográfiko | 17°28′55″N 62°59′12″W |
| Fecha | 16 novèmber 1776 |
The First Salute ta referí na e saludo di kañon ku a wòrdu lòs for di Fort Oranje na Sint Eustatius dia 16 di novèmber 1776. E saludo tabata un kontesta na e saludo di e barku merikano Andrew Doria, ku a yega e haf bou di e bandera nobo di e kolonianan ku tabata rebeldiá kontra Gran Britania. E suseso a haña un lugá importante den historia di Merka, pero tambe tabatin konsekuensianan grandi pa Sint Eustatius, un isla ku na e tempu ei tabata un sentro importante di komersio den Karibe.[1][2]
Sentro di komersio
[editá | editá fuente]Durante siglo diesocho, Sint Eustatius a bira un sentro importante di komersio internashonal, konosí tambe komo Golden Rock. E isla tabatin mas ku setenta plantashi, kaminda hende sklabisá tabata traha. Su ekonomia tabata dependé di komersio regional i internashonal, inkluyendo e komersio transatlántiko di hende sklabisá i di produkto agríkola manera suku, tabako i kòfi.[1][3]
E sistema komersial di e tempu ei tabata influensiá pa merkantilismo, ku tabata pone restrikshon riba komersio entre imperionan kolonial. Sinembargo, Sint Eustatius a logra prospera dor di su papel komo punto di trasbordo pa merkansia di diferente origen.[1]
E saludo di 1776
[editá | editá fuente]Durante e Revolushon Merikano, Sint Eustatius a bira un fuente importante di arma i munishon pa e kolonianan ku tabata lucha kontra Gran Britania. A pesar di restrikshonnan i protesta britániko, e komersio aki a sigui, pa gran parti debí na e interesnan ekonómiko di komersiantenan lokal i hulandes. E suministro di arma for di Sint Eustatius a yuda e lucha merikano, pero tambe a oumentá e tenshon entre Gran Britania i Repúblika di Shete Provinsia Uní di Hulanda.[1][2]
Dia 16 di novèmber 1776, e barku merikano Andrew Doria a drenta haf di Sint Eustatius ku e bandera nobo di e kolonianan merikano.
%2C_by_John_Trumbull.jpg)
E barku a lòs un saludo di kañon, i gobernador Johannes de Graaff a ordená pa Fort Oranje kontestá ku su propio saludo. E gesto a wòrdu interpretá pa e merikanonan komo un señal di rekonosementu dor di un representante di un poder stranhero di nan bandera nobo.[1][2]
E suseso a bira konosí komo The First Salute. Sinembargo, e saludo no tabata nifiká ku e Repúblika di Hulanda a rekonosé formalmente e independensia di Merka. E rekonosementu diplomátiko formal di Merka dor di Repúblika di Hulanda a tuma lugá na 1782.[2]
Reakshon britániko i okupashon di e isla
[editá | editá fuente]Gran Britania a konsiderá e saludo i e suministro di arma na e kolonianan merikano komo un desafío. E gobièrnu britániko a protesta i a eksigí pa e outoridatnan hulandes kondená e akshon di De Graaff. E gobernador a bai defendé su aktuashon na Hulanda, kaminda e outoridatnan finalmente a aseptá su defensa. E tenshon riba komersio i e relashon entre Hulanda i Gran Britania a kontribuí na e di Kuater Guera Anglohulandes, ku a kuminsá na 1780.[1][4]
Dia 3 di febrüari 1781, un flota britániko bou di almirante George Rodney a yega Sint Eustatius. De Graaff a entregá e isla sin un resistensia militar grandi. E británikonan a konfiská merkansia i propiedat, i e okupashon a resultá den un sakeo na gran eskala. Hopi habitante, inkluyendo komersiante, a pèrdè nan bienes; algun hende a wòrdu deportá pa otro islanan den Karibe i pa Gran Britania.[1]
E okupashon britániko no a dura. Na novèmber 1781, tropanan franses a ataká i rekonkistá e isla. Na 1784, Fransia a debolbé Sint Eustatius na gobièrnu hulandes. De Graaff a regresá tambe, pero e periodo di prosperidat anterior no a bolbe di mesun manera. E sakeo i interupshon di komersio a debilitá e ekonomia di e isla.[1]
Konmemorashon
[editá | editá fuente]The First Salute a keda un suseso importante den e relashon históriko entre Sint Eustatius i Merka. Na 1939, presidente merikano Franklin Delano Roosevelt a regalá un plakat konmemorativo na Sint Eustatius, rekonosiendo e saludo di 1776. E plakat ta instalá na Fort Oranje.[5][6] E famia Roosevelt no tabata deskonosí na e isla. Adolphus Roosevelt i Elizabeth Groebe a kasa einan na 1759.[7]
Un plakaat ku ta konmemorá e bisentenario di Merka, un regalo di U.S. Virgin Islands, a wòrdu develá na 1976, i plakaatnan grabá ku The First Salute,” regalo di organisashonnan di herensia di e Revolushon Merikano, a wòrdu develá na 2001 i 2014.
E suseso a keda konmemorá tambe pa medio di stampia postal i publikashonnan. Na 1976, pa e di 200 aniversario di e saludo, Servisio Postal di Antias Hulandes a emití un seri di stampia spesial. E historiadó merikano i ganadó di Premio Pulitzer Barbara Tuchman (1912–1989) a dediká su buki The First Salute na e papel di Sint Eustatius den Revolushon Merikano.[8][9]
E di 250 aniversario di The First Salute ta wòrdu konmemorá dia 16 di novèmber 2026, komo parti di Dia di Statia (Statia Day), e dia di fiesta anual di Sint Eustatius. Presensia di Rei Willem-Alexander, Promé Minister Rob Jetten, i Sekretario di Estado pa Relashonnan di Reino i Digitalisashon Eric van der Burg na e konmemorashon a ser anunsiá.[10]
Referensia
|