YouTube

YouTube
Logo sinds februoari 2025
YouTube zoekresultoatn, meie 2025
Type bedryf	Dochteroundernemienge
Type	Videoplatform, socioale media
Ipgericht	14 februoari 2005
Lokoatie	901 Cherry Avenue San Bruno, Californië
Land	Verênigde Stoatn
Gebied	Weireldwyd (uutgezounderd geblokkeerde landn)
Iegnoare	Alphabet Inc.
Ipndreiers	Chad Hurley Jawed Karim Steve Chen
Belangryke menschn	Neal Mohan (CEO) Chad Hurley (adviseur)
Industrie	Internet, videohosting
Productn	YouTube Kids YouTube Music YouTube Premium YouTube Shorts YouTube TV
Omzet	Patrôon:Increase $31,5 miljard (2023)
Moederbedryf	Google LLC (2006–nu)
Website	youtube.com
IPv6	Joa
Licensie	D'n uploader eit 't auteursrecht (standaardlicensie); Creative Commons is meugelik.
Programmeertoale	Python (core/API), C, C++, Java, Go, JavaScript (UI)
Reclame	Google AdSense
Registruusje	Optioneel (nodig vo te uploaddn, +18 video's te bekykn, afspeellystn te moakn en te reageern)
Gebruukers	Patrôon:Decrease 2,7 miljard actieve gebruukers per moand (januoari 2024)
Gelanceerd	23 april 2005
Status	Actief

YouTube is een Amerikoans platform vo online video's te dêeln da eigendom is van Google. YouTube wierd ipgericht ip 14 februoari 2005 deur Chad Hurley, Jawed Karim en Steve Chen, die idder vo PayPal wrochten. 't Ôofdkantoore ligt in San Bruno, Californië, en 't is de ip êen na mêest bezochte website ter weireld, achter Google zelve. In januoari 2024 aad YouTube mêer of 2,7 miljard actieve gebruukers per moand, die t'ope mêer of êen miljard eurn an video's bekeekn elken dag. Teegn meie 2019 wierd er vo mêer of 500 uur an content per menuut upgeload, en teegn 't middn van 2024 stoundn d'r in totoal oungevêer 14,8 miljard video's ip d'n site.

Ip 13 november 2006 wierd YouTube gekocht deur Google vo 1,65 miljard Amerikoansche dollar. Google zörgde d'r vôorn da YouTube mêer verdienmodelln krêeg: neffest d'n inkomste uut reclame allêne, kwoamn d'r ôok betoalde content lik films en exclusieve reeksn die specioal vo YouTube gemakt woarn. 't Biedt ôok YouTube Premium an, e betoald abonnement vo video's te bekykn zounder reclame. YouTube miek gebreuk van 't Google AdSense-programma, wuk da mêer inkomstn uutoalde vo zowèl YouTube zelve as vo de goedgekeurde contentmoakers. In 2023 brocht de reclame up YouTube in totoal 31,7 miljard dollar ip, e stygienge van 2% in vergelykienge mè de 31,1 miljard in 2022. Tusschn 't vierde kwarteel van 2023 en 't derde kwarteel van 2024 gienk de gecoembineerde omzet van reclame en abonnementn over de 50 miljard dollar.

Sinds d' overnoame deur Google eit YouTube zyn eign uutgebreid vôorby de boasiswebsite en miekn ze mobiele apps, netwerk-tv, spelletjes, en de meugelikheid om te koppeln mè andre platformn. De videocategorieën ip YouTube goan van muziekvideo's, videofragmentn, njuuws, korte en langspeelfilms, liedjes, documentaires, filmtrailers, teasers, tv-spotjes, livestreams, vlogs en nog vele mêer. 't Mêeste dêel van d'n inoud wudt gemakt deur geweune menschn, inclusief soamenweirkiengn tusschn YouTubers en bedryfssponsors. Gekende media-, njuuws- en entertainmentbedryvn ein ôok nunder zichtebeirheid vergrôot ip YouTube-kanoaln vo e grotter publiek te bereikn.

YouTube eit en oungeziene socioale impact g'ad, mè e grôte invloed ip de populaire cultuur, internet-trends, en 't creëern van stêenryke multimiljonairs-beroemdheedn. Ten spyt van zyn groei en succes, eit 't platform ôok zwoare kritiek gekreegn vo 't meugelik moakn van de verspreidienge van misinformoatie en auteursrechtelik beschermde content, 't routineus schendn van de privacy van zyn gebruukers, te strenge censuur, 't in gevoar briengn van d' veiligheid en welzyn van kienders, en vo 't nief consequent toepassn van de platformrichtlynen.

Geschiedenisse

Iprichtienge en êestn groei (2005–2006)

YouTube wierd upgericht deur Chad Hurley, Jawed Karim en Steve Chen. De drie woarn in d'n beginne weirknemers by PayPal en woarn ryk gewordn achter da eBay 't bedryf ad e-kocht. Hurley aad vormgevienge g'studeerd an de universiteit van Indiana in Pennsylvania, en Chen en Karim addn t'ope informatica g'studeerd an de universiteit van Illinois.

Vôgns e verhoal da dikkers is verteld in de media, ountwikkelden Hurley en Chen 't gedacht vo YouTube in d' êeste moandn van 2005, nadat ze moeite addn g'ad oem video's te dêeln die ze addn gefilmd ip e dinerfêestje in 't appartemènt van Chen in San Francisco. Karim wos d'r nief by up da fêestje en ountkende da 't ôoit wos gebeurd, moa Chen merkte ip dat 't gedacht da YouTube begost wos achter e dinerfêestje "woarschynlik styf versterkt is deur marketieng-ideeën om e verhoal te moakn da makkelik in de ôre klinkt".

Karim zei da d'n inspiroatie vo YouTube kwaam van de controverse round d'n Super Bowl-pauzeshow oen de borst van Janet Jackson effkes wierd blôotgeleid deur Justin Timberlake binst 't optreedn. Karim koste online moa moeilik e videoclip viendn van da incident, noch van d'n tsoenami in den Indischen Oceoan in 2004, wuk dat em ip 't gedacht brocht van e video-deelwebsite. Hurley en Chen zeien da d' ôorsprounkelikke bedoelienge van YouTube een video-versie wos van e online datingsite, g'ïnspireerd deur de website Hot or Not. Ze mieken zoekzoektjes ip Craigslist woarin dan ze schôone vrouwn vrôegn oem video's van underselve te uploaddn ip YouTube vo e belônienge van 100 dollar. Omdan ze moeite addn oem genoug doating-video's te viendn, veranderden d' iprichters nunder plan en beslisten ze oem oalle sôortn video's toe te loatn.

't YouTube-logo lik da 't wierd e-bruukt va 2005 toet 2007.

YouTube is begunn'n lik e tech-startup gefinancierd deur durfkapitoal. Tusschn november 2005 en april 2006 oalde 't bedryf geld ip by verschillige investeerders, woavan Sequoia Capital en Artis Capital Management de twêe grôotsten waoren. D'n êesten ôofdzetel van YouTube wos geleegn boovn e pizzeria en e Japans restaurant in San Mateo, Californië. In februoari 2005 registreerde 't bedryf 't domein www.youtube.com. D'n allereêste video wierd ip 23 april 2005 online gezet. Den tytel is "Me at the zoo", en 't toogt mede-uprichter Jawed Karim in d'n zoo van San Diego en j' is vandoage nog olsan te bekykn ip de site. Ip diezeste dag lanceerde 't bedryf een oopnboare bèta en teegn november wos e reclamefilmke van Nike, mè Ronaldinho d'r in, d'n êestn video die e miljoen views oalde. De website gienk uut zyn bèta-foaze in december 2005, en binst dien tyd wierd d'n website ol 8 miljoen ki per dag bekeekn. In d'n beginne mochten de filmpjes nie grotter zyn of 100 megabyte, wuk da somtyds gelykstound an zjuust 30 secondn beeldmaterioal.

YouTube was ni d' êeste videowebsite ip 't internet; Vimeo wos oal upgericht in november 2004, oewêl da die site êest e nevenproject bleeft van under ountwikkeloars uut CollegeHumor. Ip 17 december 2005, dezeste weke da YouTube uut de bèta-foaze kwam, zond de njuuwszender NBCUniversal binst Saturday Night Live de sketch "Lazy Sunday" van The Lonely Island uut. Neffest de kyksyfers vo de latere uutziendiengn te doen stygn vo Saturday Night Live, elpte d'n status van "Lazy Sunday" lik êen van d' êeste viroale video's om YouTube echt ip de koarte te zettn. Ounofficiële uploads van de sketch up YouTube oalden tegoare mêer of vuuf miljoen views teegn februoari 2006 vôorn dan ze wierden weuggehoald oen NBCUniversal doa round vroeg vanweuge auteursrechtn e poar moanden loater. Ten spyt dan ze uutendelyk weuggehoald wierdn, elpten die dubbele uploads oem YouTube nog populairder te moaken en leidde da toet et uploaddn van mêer content van derden. De site groeide lik kôol; in juli 2006 makte 't bedryf bekend da d'r elken dag mêer of 65.000 nieuwe video's wierdn upgeload en da ze eounderd miljoen views per dag oaldn.

De keuze van d'n noame youtube.com leidde toet probleemn vôor een andren website met e gelykoardigen noame, utube.com. Den iegnoare d'rvan, Universal Tube & Rollform Equipment (Universal Tube), spande e proces an teegn YouTube in november 2006, achter dan ze constant overbelast wierden deur menschn die YouTube zochten. Universal Tube eit zyn domein d'rachter zelve veranderd noar www.utubeonline.com.

"Broadcast Yourself"-perioode (2006–2013)

Ip 9 oktober 2006 makte Google bekend dan ze YouTube aen e-kocht vo 1,65 miljard dollar in Google-andêeln. De koop wierd offysjeêl ofgeround ip 13 november 2006. D' overnoame deur Google zörgde vo e nieuwe interesse in videowebsites; IAC, die intusschn Vimeo a gekocht, focuste nunder ip 't oundersteunen van contentmoakers vo under te ounderscheidn van YouTube. In dien tyd paktige YouTube d'n slogan "Broadcast Yourself" an.

't Bedryf kende nen enormen groei. The Daily Telegraph schrêef dat YouTube in 2007 in zyn eentje êvenvele bandbrêedte verzoop lik 't hêle internet in 2000. Teegn 2010 aad 't bedryf e marktoandeel van round de 43% bereikt en mêer of 14 miljard video's wierdn bekeekn, vôgns comScore. Da joar miek 't bedryf zyn interface simpeler om den tyd da gebruukers ip de site spendeerdn te verogen.

In 2011 wierdn d'r elken dag mêer of drie miljard video's bekeekn en wierd er elken menuut vôor 48 uur an nieuwe video's upgeload. 't Mêeste van die views kwaam van e relatief klêne bende video's; vôgns e software-ingenieur uut dièn tyd wos 30% van de video's verantwoordelik vo 99% van alle views ip de site. In dat zeste joar veranderde 't bedryf nog e ki zyn interface en introduceerdn ze tegelykerweug e nieuw logo met e dounkerdere rôoe kleur. E doarip volgende anpassienge van d'n interface, bedoeld oem d' ervoarienge ip d'n pc, tv en gsm ip mekoar te loatn trekkn, wierd uutegerold in 2013. Teegn ton wierd er elken menuut vôor 100 uur upgeload, wuk da in november 2014 al verôogd wos toet 300 uur.

D'n ôofdzetel van YouTube in San Bruno, april 2017

Binst dizze perioode gienk 't bedryf ôok deure een oop organisoatorische veranderiengn. In oktober 2006 verhuusde YouTube noar e nieuw kantoor in San Bruno, Californië. Hurley koendigde an dat 'n gienk oftreedn lik CEO van YouTube om een adviseursrolle an te pakkn en da Salar Kamangar 't bedryf gienk overpakkn in oktober 2010. In april 2009 sloot YouTube e soamenweirkiengsakkoord mè Vevo. In meie 2010 wierd "Bad Romance" van Lady Gaga de mêest bekeekn video, en d'n êestn video die 200 miljoen views oalde ip 9 meie 2010.

YouTube krêeg e gigantisch proces an z'n bêen van Viacom International in 2011 da 't bedryf bykans de nekke a omgedroaid. 't Proces wierd an'espann deure de beweerde inbreuke ip de auteursrechtn van Viacom eur materioal deur YouTube. 't Amerikoansche Hof van Beroep vo 't Twidde Circuit oordeelde echtewel da YouTube nief ansprakelek wos, en ezo won YouTube de zoake in 2012.

Susan Wojcicki as boas (2014–2023)

YouTube-logo van 2015 toet 2017

Susan Wojcicki wierd in februoari 2014 an'esteld lik CEO van YouTube. In januoari 2016 breidde YouTube zyn ôofdzetel in San Bruno uut deur e kantoorpark te koopn vo 215 miljoen dollar. 't Gebouw eit 51.468 vierkante meter en kut toet 2.800 werknemers huusvestn. YouTube lanceerde in ogustus 2017 offysjeêl de "polymer" herontweirp van under gebruukersinterfaces gebaseerd up Material Design lik standaard, tegoare med e veranderd logo dat gebouwd is round de "play"-knop van de website.

Binst dezen tyd probeerde YouTube e masse nieuwe maniern oem geld te verdienn buutn de geweune reclame-inkomstn. In 2013 lanceerde YouTube e proefprogramma vo contentmoakers vo abonnementskanoaln an te biedn. Dit initiatief wierd in januoari 2018 ofgeschaft moa in juni weere erlanceerd, me kanoalabonnementn van $4,99. Die kanoalabonnementen waoren nen toevoegienge up de bestoande Super Chat-functie die in 2017 gelanceerd wierd, woarmee da kykers tusschn de 1 en 500 dollar kostn doneern om nunder bericht te doen upvolln. In 2014 koendigde YouTube een abonnementsdienst an ounder d'n noame "Music Key", die 't ad-free streamn van muziek up YouTube bundelde met de bestoande Google Play Music-dienst. D'n dienst bleeft zyn eign ountwikkeln en in 2015 koendigde YouTube YouTube Red an, e nieuwe premiumdienst die ad-free toegang gienk biedn toet oalle content ip 't platform (as upvolger van Music Key da 't joar idder wos uutebracht), exclusieve originele series en films gemakt deur YouTube-persôonlykheedn, en de meugelikheid om content in d'n achterground of te speeln ip mobiele appoaraten. YouTube lanceerde ôok YouTube Music, e derde app die gericht wos ip 't streamn en ountdekken van muziek ip 't YouTube-platform.

't Bedryf probeerde ôok productn te moaken die antrekkelik woarn vo specifieke kykers. YouTube brocht in 2015 de mobiele app YouTube Kids uut, die ontworpen wos om e ge-optimaliseerde ervoarienge vo kienders te biedn. 't Ad e simpele gebruukersinterface, e gecureerde selectie van kanoaln mè leefteidsgeschikte content, en functies vo ouderlyk toezicht. Ôok in 2015 lanceerde YouTube YouTube Gaming—een applicoatie gericht ip video-games vo video's en livestreams, bedoeld om de concurrentie an te goan mè Twitch (eigendom van Amazon). In april 2018 vound d'r e schietpartye plôats in d'n ôofdzetel van YouTube in San Bruno, Californië, woaby datter viere menschn gewound raaktn en de schutter sterfde.

Teegn februoari 2017 wierd er elken dag vôor e miljard uur an YouTube-video's bekeekn, en wierd er elken menuut vôor 400 uur an video's upgeload. Twêe joar loater was da gestegen noa mêer of 500 eurn per menuut. Binst de COVID-19 pandemie, oen bykans de hêle weireld ounder lockdown zat, steeg 't gebruuk van dienstn lik YouTube enorm. Forbes schatte da YouTube teegn 2024 goed wos vo 16% van aol 't internetverkêer, e stygienge vanof de 11% in 2018, voôr de pandemie. Lik antwôord up EU-founctionoarissn die vroegn of da zudane dienstn under bandbrêedte kostn verleegn zoda medische dienstn genoug bandbrêedte over ielden oem informoatie te dêeln, zeiden YouTube en Netflix dan ze de streamkwaliteit vo minstns dertig doagn gienkn verleegn oem 't bandbrêedte-gebruuk mè 25% te doen zakkn om an d' êis van d' EU te voldoan. YouTube koendigde loater an dan ze die moatregele weireldwyd gienkn toepassn: "We bluuvn nauwe t'opewirkn mè regeriengn en netwerkbeheerders over d' êle weireld om ouns dêel te doen om d'n stress ip 't systeem te minimoliseern binst d'oungenziene situoasje."

Achter e klacht in 2018 over de vermeende schendiengen van de Children's Online Privacy Protection Act (COPPA), kreeg 't bedryf e boete van 170 miljoen dollar van d'n FTC vôor 't verzoamelen van persôonlyke gegeevns van mienderjoarigen ounder de 13 joar. YouTube moeste ôok systemen moakn oem de privacy van kienders te verbêetern. Achter kritiek up d' implimentoatie van die systemn begost YouTube vanaf 6 januoari 2020 oalle video's die an'eduud wierdn as "gemakt vo kienders" te beandeln as ansprôaklik ounder COPPA. Neffest d'n YouTube Kids-app, miek 't bedryf in 2021 e g'superviseerde mode, die mêer ountworpen is vo tieners. Doaboovnup lanceerde YouTube ôok YouTube Shorts, e platform vo korte video's oem de concurrentie an te goan mè TikTok en Instagram Reels. In dièn tyd raakte YouTube verwikkeld in ruuzjes mè andere techbedryvn. Tusschn 2018 en 2019 wos d'r mêer of e joar lank gèn YouTube-app beschikboar vo Amazon Fire-productn. In 2020 oalde Roku d'n YouTube TV-app uut nunder streamingwinkel nadat d'twee bedryvn nief toet een akkôord kostn kommn.

Achter e poar testsidder in 2021, oalde YouTube d' openboare wyzige van 't aantal "dislikes" by video's weug in november 2021. D' reeden d'rvôorn was vôgns nunder intern ounderzoek da gebruukers d' dislike-functie dikkers gebruukten lik e vorm van cyberpesten en 'vote brigading'. Oewêl da sommigte menschn 't e goe gedacht vounden oem trollen weug te joagen, vounden andren 't just slicht omdan ze doadeure moeilikker clickbait of ounnuttige video's kostn herkenn'n en dat d'r ol e masse andre functies bestounden oem pesten teegn te goan. YouTube mede-uprichter Jawed Karim noemde 't uutoalen "e dom idee" en zei da d'n echtn reeden "gèn goen is, en ene datter nôoit uutgelegd goat wordn". Je vound da de meugelikheid van gebruukers om up e platform schoadelikke inoud te herkennen essentiël is, mè d' wôordn: "'t Systeem weirkt, en d'r is nen noame vôo: de wysheid van d' massa. 't Proces briekt as 't platform d'r eign moeit. Ton goat 't platform onvermydelik achteruut." Rap achter die aankondigienge miek software-ountwikkelaer Dmitry Selivanov "Return YouTube Dislike", een open-source derde-party browserextensie vo Chrome en Firefox die 't antal dislikes by e video were toogt an d'n gebruuker. In nen brief e-publiceerd up 25 januoari 2022 gaf d'n toenmoalign CEO Susan Wojcicki toe dat 't weughoaln van d' dislikes e controversiële beslissienge wos, moa z'n bleeft d'r achter stoan en zeide da "'t antal dislike-anvolln vermienderde."

In 2022 begost YouTube met een experiment woarby 't bedryf gebruukers die langre video's ip tv bekeekn een lange reke van korte nief-skippoare advertensjes toogde, med de bedoelienge oem oalle reclame noar 't begin van d'n video te stuwen. Achter e zwoarn storm van publyke kritiek ip 't ongewoon ôle antal nief-skippoare reclames, eit YouTube 't experiment stop'ezet up 19 september van da zèlfste joar. In oktober koendigde YouTube an dan ze anpasboare gebruukers-handles giengen introeduceern boovnop de kanoalnoamn, wuk da d'rachter ôok de kanoal-URL's zoudn wordn.

Neal Mohan as boas (2023–nu)

YouTube-logo van ogustus 2017 toet februoari 2025

Ip 16 februoari 2023 ankoendigde Wojcicki da ze gienk stoppn lik CEO, en Neal Mohan wierd e-noemd lik euren ipvolger. Wojcicki paktige een adviseursrolle op by Google en 't moederbedryf Alphabet. Wojcicki stierf e goe joar en e 'n alf loater an longkanker (non-small-cell) ip 9 ogustus 2024. Ende oktober 2023 begost YouTube e stikkere anpak teegn 't gebruuk van ad blockers (reclame-blokkeerders) ip 't platform. Gebruukers d'rvan krêegn e pop-up woarschuwinge met d' boodschap "Video player goat geblokkeerd zyn achter 3 video's". Gebruukers krêgen d'n iproep om d' advertensjes toe te loatn of e betoald abonnement te pakkn up 't reclamevrije YouTube Premium. YouTube zeide da 't gebruuk van ad blockers nunder gebruuksvôorwoarden schond. In april 2024 ankoendigde YouTube dazze "nunder handhaevieng uutbreid'n ip derden-apps die d'n service-vôorwearden van YouTube schenden, specifiek apps vo 't blokkeern van reclame". Vanaf juni 2024 liet Google Chrome weetn da z' Manifest V2 giengn vervangn in 't vôordêel van Manifest V3, wuk dat doômé de oundersteuning voo de mêeste ad-blockers de nekke omdroaide. Roend diezèlfsten ty'd is YouTube oôk b'gonn met "server-side ad injection", e techniek die 't mûgelik moe moaken dat 't platform de reclame rechstrêeks binn'n in d'n video instikt, in plàatse van e apart bestangt te ièn die geblokkeert zoe kunn'n wird'n.

In september 2023 stèlde YouTube een in-app spelletjiesplatform voor ounder de noame "Playables". 't Kwam vry voo olle gebruukers in meie 2024, achter dat 't êest moar alleên vo de premium-abboenement'n wos. In december 2024 begost YouTube me te testn met e nieuwe multiplayer-founctie vo dièn diênst, vo multiplayer-games zowel up de pc lik ip d'n gsm toe te laoten. Teegn decëmber 2024 ad de catalogus van Playables mîer dan 130 spellen in vêel verschiellnde gënres, met dr oonder trivia, acssie, en sport. In december 2024 bröcht YouTube weere nieuwe riechtlynn uut teegn d'n video's mé klikbait tittels oem te zorg'n vwo den hoêg'n kwaliteyt en vo te striedn teegn misinformaetsiè. 't Platfoorm eit d' ambitie vo de moakers th'e straffn die mislêednde of sensationele titels uutzend'n, watta leiedd in mûgelik'e straffen lîk t weughaaln van d'n video of 't giel kanöâl ip te skoortn. Volg'ns YouTube zal dizz'e riechtlyne êst wordn in'gevoert in Indië, om in de volgnde moanden uutgebreid te wordn noa andren lând'n.

Ip 14 februoari 2025 vierde YouTube da ze 20 joar b'stoundn. Ip 30 juli 2025, met d' invoeering van den Online Safety Act 2023 in 't Verênigd Keunienkryk, miek Google bekend da ze e test giengn doên om "leeftydscontroles" toe te passn up geselecteerde gebruukers in de Verênigde Stoatn. Machine learning goat gebruukt wordn oem de leêftyd van d'n gebruuker te checken (zounder te kiken na de gegevens die z' up nunder account ein in'egeevn) en om d'n toegaank toet bepoalde content en functies ip oalle Google-platformn, inclusief YouTube, te beperkn (mè ounder andre 't uutschakeln van gepersonaliseerde reclame en 't in vôeg briengn van digitale welzynslimieten) as z' anzien wordn lik mienderjoarig ounder de 18 joar. Ip YouTube goat da gebaseerd zyn ip factor'n lik de zoek- en videogeschiedenisse en d'n ouderdom van d'n account. D'n gebruuker moe e leeftydsverificoatie doen via e betoalienge, een id-koarte of e selfie oem by oalle functies te kùnn'n as 't em uutkomt da t'n e mienderjoarigen is. Ip 9 april 2025 sprak YouTube zyn steun uut vo de NO FAKES Act van 2025, g'ïntroduceerd deur d'n senateur Chris Coons (D-DE) en senateur Marsha Blackburn (R-TN), en koendigde een uutbreidienge an van nunder proefprogramma dat is ontworpen vo content t'erkennen die gemakt is deur AI.

Up 23 september 2025 liet moederbedryf Alphabet weetn dan ze contentmoakers weere giengn toeloatn die idder verbann'n woarn vo 't verspreidn van misinformoatie over COVID-19 en de Amerikoansche presidentsverkieziengn van 2020. Binn'n de context van de schorsienge van Jimmy Kimmel en de debattn over 'vryheid van mêniengsuutienge in Amerika', verdedigde d'n vicepresident J.D. Vance de schorsienge van Kimmel en oalde j' in de plekke doarvan e brief an die deur d'n advocoat van Alphabet, Daniel F. Donovan, na d'n vôorzitter van 't Amerikoansche House Judiciary Committee, Jim Jordan, was e-zoundn. In die brief wierd er beweerd da de Biden-administroatie YouTube ounder druk aad e-zet oem "nief-overtredende user-generated content" mè misinformoatie over de pandemie en de verkieziengn weug t' oalen. Ze maktn d'r ôok bekend dan ze d' accounts weere giengn herstelln van de moakers die deur die e-citeerde content woarn verbannen; moa die beweirdiengn zyn nôoit formeel beweezn, en 't Amerikoans Hôoggerechtshof verwierp in 2024 de "First Amendment"-zoake Murthy v. Missouri (die beweirde da d' administroatie de media bedryvn dwong vo conservatieve meniegn, regeringskritiek en COVID-misinformoatie te censureern) met e uutsprake van 6-3. De rechtbank besliste da noch de ministers van justiesje van Missouri en Louisiana, noch d' andre betrokkenn, de bevoegdheid addn vo de zoake an te spannn. De beslissienge van Alphabet oem de YouTube-moakers die misinformoatie verspreiddn weere ip 't platform te loatn, krêeg e masse kritiek omdan ze de vôorkeure goaven an "vryheid van mêniengsuutienge" boovn "feiten".

Ôofdledienge

YouTube wudt oal sinds d' iprichtienge in 2005 e-leid deur nen CEO. D'n êesten wos Chad Hurley, die 't bedryf toet an 2010 heit bestuurd. Zèlfs achter da Google YouTube overpakte, is de CEO-rolle bleevn bestoan. Salar Kamangar nam in 2010 de plekke van Hurley in en bleeft up dièn stoel zittn toet an 2014. Je wierd ton vervangn deur Susan Wojcicki, die eur uutendelik uut die founctie trugtrok in 2023. Ip 16 februoari 2023 wierd Neal Mohan an'esteld as d'n nieuwn CEO.

Founcties

Zie ôofdartikel: Lyste van YouTube-founcties

YouTube biedt e masse verschillige founcties an die ofangn van de verificoatie van d'n gebruuker. Da goat van standoard boasis-meugelikheedn lik 't uploaddn van video's, 't moakn van afspeellysten en 't gebruukn van YouTube Music, mèi limietn die afangn van joun dagelikse activiteit (verificoatie via e gsm-numero of d'n ouderdom van joun kanoal zörgen d'r vôorn daje mêer founcties krygt en je dagelikse limietn verôgen). D'r zyn ôok intermediaire of extra founcties lik 't meugn uploaddn van video's die langer duren of 15 menuuten, live-streamen, eign fotoosjes (thumbnails) toevoegn an joun video, en 't moakn va podcasts. Ten latste zyn der de g'avanceerde founcties, woarounder bezwoar indienen vo Content ID, live-streams insluutn (embedden) ip andre sites, inkomstn (monetisoatie) anvragen, klikboare links toevoegn, ôofdstikken an de player toevoegn en reacties van kykers vaste pinn'n ounder video's of in community-postjes.

Video's

Zie ôofdartikel: Lyste van YouTube-video's

In januoari 2012 wierd der geschat dat de bezoekers ip YouTube gemiddeld 15 menuutn per dag up de site deurebrochtn, in teegnstellienge toet de viere of vuuf euren dat e geweunen Amerikoan per dag na de tv zat te kykn. In 2017 keeken de kykers gemiddeld mêer of e uur per dag noa YouTube up mobiele toestellen. In december 2012 wierdn d'r 2 miljard views weuggehoald by de weergavecyfers van muziekvideo's van Universal en Sony ip YouTube, wuk da leidde toet de beweirienge van The Daily Dot da de views gewist woarn wegens 't schendn van de gebruuksvôorwaarden, die 't gebruuk van g'automatiseerde processn (bots) verbieden om views ip te bloazen. Dit wierd teegngesprookn deur Billboard, die zèi da de twêe miljard views gewôon verplatst woarn noa Vevo, omdan de video's nief mêer actief woarn ip YouTube zelve.

Ip 5 ogustus 2015 fixte YouTube e beruchte foute die 'r vôorn zörgde dat de view-teller by e nieuwe video bevrôor up "301" (loater "301+") toetda 't echt aantal geverifieerd kost wordn om fraude teegn te goan. D'rachter begostn de views van YouTube oal in realtime by te wirkn. Sinds september 2019 wudt 't aantal abonnees ofgekort getoogd. Ollêne d' êeste drie cyfers van 't abonneesyfer van e kanoal wordn oopnboar getoogd, woardeure da functies van derde partyen die 't in realtime meetn, lik Social Blade, bykans nie mêer wirkn. D' exacte cyfers bluuvn wel toegaankelik vo d' iegnoars van 't kanoal bin'n in YouTube Studio.

Up 11 november 2021, achter dat d' anpassienge test was gewist in de moarte van 'tzelfste joar, miek YouTube bekend dan ze giengn begunn'n mè 't verbêrgen van d'n dislike-teller vo de kykers. 't Bedryf zèèi da die beslissienge wos genomeen uut d' experimentn woaruut datter bleek da de klêenre YouTube-moakers enorm dikkers 't doelwit woarn van gecoördineerde dislike-anvall'n ("vote brigading") en gepest. De moakers zelve kunn wel nog olsan zien oevele dislikes en likes ze ein in nunder eigen YouTube Studio-dashboard. YouTube eit e geschat andoal van 14,8 miljard video's woarvan datter oungeveir 4% nog nôoit ènen oalven kyker eit g'ad. Iet mêer of 85% d'rvan eit miender of 1.000 weergaven.

Auteursrechtprobleemn

Zie ôofdartikel: YouTube auteursrechtprobleemn

Zie ôok d' inkomstn vo auteursrechthoueders

YouTube eit oal e masse uutdoagingen en kritiek g'ad in under pogiengn oem mè auteursrechtn omme te goan, inclusief met de site eur êeste viroale video, "Lazy Sunday", die der ofg'hoald moest wordn wegens probleemn mè auteursrechtn. Ip 't moment daje e video oploadt, krygn YouTube-gebruukers een bôodschap the zien die under vrôagt oem gèn auteursrechtwetten te schenden. Ondanks dit advies bluuvn d'r e masse oung'autoriseerde stikskes van auteursrechtelik beschermd materioal ip YouTube stoan. YouTube kykt noooit na de video's vôorn dan ze online stoan, en 't wudt oavergeloaten an d' iegnoars van 't auteursrecht om een DMCA takedown-bericht te sturen volgns de vôorwaarden van de Online Copyright Infringement Liability Limitation Act. Elke goedgekeurde klacht over 't schendn van auteursrechtn leid toet e "YouTube copyright strike". Drie van zukke strikes teegn ne gebruuker zörgt d'r vôorn dat 't account en oal d' upgeloade video's wordn uutewist. Tusschn 2007 en 2009 ein bedryvn lik Viacom, Mediaset, en d' Iengelsche Premier League rechtszaekn an'espannen teegn YouTube, bewerend da 't bedryf te winnig ad gedoan oem 't uploaddn van beschermd materioal teegno te goan.

In ogustus 2008 bepoalde een Amerikoanschen rechtbank in Lenz v. Universal Music Corp. da d' iegnoaren van auteursrechtn nief zomaar meugen vragen oem een online bestand weug te hoalen zounder êest te bekykn of datter gèn sproake wos van billik gebruuk (fair use) van 't materioal. Iegnoare Google ankoendigde in november 2015 dan ze giengn helpn mè 't betoaln van de gerechtskostn in e poar uutgekozzen zoaken woarby dan z' overtuugd woarn da "fair use" van passings was. In de zoake uut 2011 van Smith v. Summit Entertainment LLC daegde d'n professionelen zanger Matt Smith Summit Entertainment vôo d'n rechter vo 't ounterecht gebruuk van de takedown-berichtn up YouTube. J' bracht zeven actiepunten an, woarvan da d'r viere in 't vôordêel van Smith wierdn e-voenist. In april 2012 oordeelde e rechtbank in Hamburg da YouTube wèl ansprôakelik kost g'oudn wordn vöör e'auteursrechtelijk beschermde materioaln diê deur nunder gebruukers up d'n site gepost woarn. Ip 1 november 2016 wierd 't ruzie mèi de GEMA ipgelost, woarby da 't Google Content ID-systeem gebruukt gienk wordn oem advertensjes by te steekn up video's mè materioal da deur de GEMA beschermd wierd.

In april 2013 wierd er gemeld da Universal Music Group en YouTube e contract add'n da verbeed dat inhoud diê ip verzoek van UMG wierd geblokkeerd nog kostehersteld wordn, zelfs ol dende d'n uploader van de video e DMCA contra-klacht in. As dêel van YouTube Music têkendn Universal en YouTube in 2017 een akkôord, wuk da loater gevolgd wierd deur aparte akkôordn mè andre grôte labels, wuk da 't bedryf 't recht gof ip advertensie-inkomsten a nunder muziek op YouTube wierd ofgespeeld. Teegn 2019 kreêg'n creadêurs the moakn mè video's die ofgenoomen wierden of nunder geldinbrieng kwyt raktn, ols Content ID zelfs moa piepkleine stikskes an g'auteursrechte muziek in een eênorm langere video erkende, mè verschillige gradaties van strafn