Henna Tervaniemi jurgâl párnáikiirjijd suomâkielâst sämikielân. Tervaniemi lii jurgâlâm čällee Timo Parvela Ella-kirjerááiđu kiirjijd já sänileihâiguin šaddeh háástuh. Čuolmah šaddeh, ko eđâlduvâi hitruuvuođâ kolgâččij siäiluttiđ veikkâ kielâ muttoo.
– Motomeh láá tagareh kulttuurčuolmah já motomeh pyehtih leđe idiomaatliih. Iä lah tagareh säänih anarâškielâst, maid taarbâš ko sirdá suomâkielâ jurduu anarâškielân, iätá Tervaniemi.
Veikkâ sänileeihâi jurgâlem lii hástulâš, te tot lii Tervaniemi mielâst hitruu. Sun muštâl, et jyehi sänileikkâ lii ain ereslágán, ko hundâruš tom, mii jurgâlusâst lii tergâdumos.
– Kalga smiettâđ ubâlâšvuođâ, et mii lii eidu tom mainâs tááhust tehálâš. Lii-uv tot talle tot merhâšume siäilum vâi huumor siäilum, Tervaniemi muštâl.
Anarist tollui Kielâkäldee ornim anarâškielâ seminaar, mon fáddán lâi jurgâlem. Seminaar čoogij oohtân jurgâleijeid, máttáátteijeid tâi mudoi sämikielâst perusteijeid.
Seminaarist lijjii jieškote-uvlágán jurgâlmân lahtoseijee sahâvuáruh.
Jurgâlem kiäsut sämikieláin pargee ulmuid
Anarâškielâ seminaar jurgâlemfáddá lii Kielâkäldee anarâškielâ pargee Jukka Mettovaara mielâst pyeri, ko iänááš anarâškielâ sárnooh kalgeh jurgâliđ uáli ennuv.
– Masa vaarâ puoh, kiäh pargeh anarâškieláin mottoomnáál kalgeh jurgâliđ nuuvt ennuv, te tast ličij tehálâš sárnuđ, muštâl Mettovaara.
Kielâseminaar čielgâsávt kiäsut anarâškielâlijd ulmuid. Mettovaara muštâl, et seminaar lijjii čuávumin suullân 20 pääihi alne já loves káidusohtâvuođáin.
Seminaarist lâi meid jurgâlempargopáájá, kost Mettovaara oovdânpuovtij jurgâlemčuolmâid, maid sun lii kuáhtám pargostis.
– Ovdâmerkkân maid lep kielâlävdikoddeest kieđâvuššâm láá tagareh jieškote-uvlágán ellei šlaajâi já suuvâi noomah. Toh láá motomin eromâš vaigâdeh já lii hástulâš keksiđ veik oovtâ šlaajân noomâ, Mettovaara arvâl.
Seminaar lâi sämikielâi oho ääigi Saijoos parlamentsalist 21. roovvâdmáánu.