菜（粵拼：coi3），或者叫蔬菜（so1 coi3）或者菜蔬，係一類本質為植物嘅嘢食，通常都會有豐富嘅纖維同維他命，如果係豆類嘅話，重會有好多蛋白質。佢無科學嘅定義，係好主觀嘅。
除咗生果、殼、果仁、山草藥、香料之外，任何一種食得嘅草本植物，都可以叫做菜。菇之類都算係菜，雖則佢係生物學上係另一界，屬於真菌界。（以前係歸入植物。）
菜有分葉菜，例如生菜；莖菜，例如蘆筍；根菜，例如蘿蔔；花菜，例如西蘭花；地下莖葉（例如蒜頭）；瓜菜，如青瓜、南瓜、牛油果、青椒等；豆菜，例如青豆、荷蘭豆、豆角。
因為菜唔係植物學名詞，所以有啲菜同時又係生果。一般嚟講，菜多數都唔甜；不過都有啲例外，好似南瓜就係。
喺廣東話入邊，「菜」亦可解作女朋友，例如「你條菜」即係「你個女朋友」咁解。
