題目分析

心理測量講嘅題目分析，又或者叫項目分析，係設計心理測驗用到嘅一系列統計方法，其諗頭起碼可以追溯至一九三六年。無論用緊咩模型—古典測驗理論定係題目反應理論—佢哋都有相似嘅最終目標：想建構出純粹又全面嘅測驗，準確噉量度指定嘅心理特性，當中指定咗嘅心理特性可以係智能，或者外向度等嘅性格特質，而且假設信度同效度等因素不變，測驗好多時係愈簡短愈好。

運作流程

响實際操作上，研究者首先會諗出一大堆候選題目，過程中周不時要邀請專家返嚟做判斷，呢啲題目睇落合理，即係要有內容效度同埋表面效度，然後再搵一啲能夠代表研究總體嘅人群作答。常見嘅技巧，包括確保候選題目數量要係預想測驗長度嘅 10 倍或以上而測試嘅樣本亦要比題目數量多最少幾倍。

搵咗人返嚟答題目，得到數據，研究者就會用統計方法，篩走唔合格嘅題目。譬如喺古典測驗理論下，以下三類題目通常會攞走：

• 區分度過低：如果某條題目，個個受試者嘅答案都差唔多，例如 99% 嘅人都答係，噉呢條題目就做唔到將唔同特質嘅人區分開，冇咗測量嘅價值；喺教育評估中，呢種情況之所以出現，好多時都係因為條題目太難或者太易。
• 高度重疊：如果某條題目，同第啲題目嘅統計相關極高，就表示佢哋量度緊嘅嘢一樣，出現咗冗餘嘅情況。
• 同整體測驗脫咗節：另一方面，假如某條題目同其餘題目嘅統計相關過低，亦有問題—反映條題目似係量度緊第啲嘢。詳情可以睇埋卡隆巴系數嘅內容。

採用題目反應理論嘅研究者，有其他方法評鑑題目嘅質素。

重要指標

題目分析會用到嘅統計指標一覽：

• 卡隆巴系數
• 題總相關
• 區分度指數 (暫譯) ：反映手上嗰條題目有幾分辨到能力高嘅受試者同能力低嘅受試者，區分度指數低，可以係表示條題目極易或者極難，或者條題目寫得唔夠清楚，個個都答啱或者個個都答錯。

睇埋

• 心理測量
• 統計相關
• 因素分析
• 教育評估

參考

• Guilford, J. P. (1936). Psychometric methods. New York: McGraw-Hill.
• Kline, P. (1986). A handbook of test construction. London: Methuen. ISBN 0416394302.
• Understanding Item Analyses