黑暗森林法則

黑暗嘅森林：裏頭嘅動物，隻隻都唔想畀第啲動物發現，所以個個都盡可能匿埋或者靜靜雞行動。

黑暗森林法則，或者叫黑暗森林假說，係一個猜想，有關外星文明嘅。黑暗森林個諗法嘅重點係話，宇宙入便其實大把外星文明，但係佢哋個個都盡力匿埋，唔想畀其他文明搵到，理由係驚住會遇到科技上先進過自己又懷有敵意嘅文明。黑暗森林法則喺外星文明、費米悖論同埋科幻相關討論上都引起咗關注。

有唔少研究者認為，若果黑暗森林個諗法係真嘅，人類唔應該主動去搵外星生命：人類主動向外太空發放訊號，話畀外星人知地球有文明，咁做可能會帶來風險；因此佢哋主張，人類應該審慎看待接觸外星文明嘅行為，小心提防向外星人暴露自身位置而帶嚟嘅風險。

來源

黑暗森林，粵拼：hak1 am3 sam1 lam4，呢個名據講係出自劉慈欣喺二〇〇八年出版嘅小說《三體 II：黑暗森林》，不過喺佢之前經已有科學家同科幻作家喺度討論呢個諗頭，例如早喺一九八三年，天文學家兼作家嘅大衛·布林就提出咗好近似嘅見解，但係並冇用黑暗森林呢個名。

背景

内文：費米悖論

截至廿一世紀初為止，並無任何可靠或者可重複驗證嘅證據，證實有外星生命到訪過或者嘗試接觸地球。儘管人類已經大舉搜尋過外星生命，但係仲未偵測到任何訊號，亦搵唔到確鑿證據證實高智能外星生命存在。呢個事實同以下呢個觀察，望落完全背道而馳：

1. 宇宙入面充滿咗極大量嘅行星，其中一啲行星可能具備適合生命生存嘅溫和條件，例如位置上喺正宜居帶，唔會太熱又唔會太凍。
2. 根據人類對地球生命嘅觀察，生命傾向係咁擴散，直至去到星球每個可容納生命嘅角落為止，而一旦佢哋有太空探索嘅技術，好可能會向外星擴展。

呢啲互相矛盾嘅事實，就構成咗費米悖論嘅核心諗法。

黑暗森林嘅假說，被指可以解釋到費米悖論嘅問題，《三體 II：黑暗森林》嘅內容係咁講：

宇宙就係一座黑暗森林，每個文明都係揸槍嘅獵人，好似幽靈咁喺林間匿埋，出盡全力隱藏自己嘅蹤跡，任何暴露自己存在嘅生命都會畀其他人消滅，喺呢座森林入面，其他人就係地獄，就係永恆嘅威脅。

分析

睇埋：零和遊戲

亦有研究者用博弈論嘅角度嚟分析黑暗森林想像中嘅情況。呢種情況，屬於序貫而且不完全資訊嘅博弈。

喺博弈論裡便，序貫而且不完全資訊嘅博弈，係講緊博弈者一個接一個輪流行動，但係每個個體對於其他個體嘅選擇同埋策略，所知有限。喺黑暗森林嘅博弈中，各文明嘅首要目標係確保自身生存。仲有一個額外嘅掣肘，就係重要資源非常稀少。簡單咁想像嘅話，每位博弈者都有幾個可能選項，包括係郁手毀滅已發現嘅文明、向周圍嘅文明宣傳自己存在、或者係咩都唔做等等。

劉慈欣係咁樣嚟思考黑暗森林嘅，喺佢嘅分析之中，無論地球人嘅科技水平係幾高，畀外星人發現都有相當嘅風險對人類嘅生存造成威脅。假想依家有兩粒行星 A 同 B，兩者各自發展出有智能嘅生命，而且兩者都有文明，咁嘅話考慮兩個重點因素：佢哋有冇能力毀滅對方以及發現咗對方未，以下係黑暗森林法則嘅解釋：

批評

都有唔少人批評黑暗森林法則嘅諗法。《黑暗森林法則》假設所有文明都必然以生存為最高目標，因此一旦發現其他文明，就應該先下手為強，避免自己受到消滅。其實有幾個值得質疑嘅地方。

首先，佢假設所有文明都一定會作出最理性嘅選擇。心理學同神經科學研究指出，人嘅決策並唔係純粹靠理性，而係同時受到情緒、文化、道德同社會因素影響 。如果連人類都唔係每次都依照理性行事，就更加冇理由假設，所有外星文明都一定會用同一套冷冰冰嘅邏輯 。

第二，黑暗森林法則將宇宙睇成一個零和遊戲，認為「你生存就等於我危險」。但歷史顯示，合作往往比衝突帶來更大效益。國家之間雖然存在競爭，但同時亦建立咗外交、貿易、國際組織同合作機制。信任雖然有風險，但並唔代表合作一定唔可能。

第三，黑暗森林法則建立喺最壞情況推理之上。由於無法確認對方係敵係友，所以選擇先消滅對方。然而，呢種思維容易變成一種「自我實現預言」：如果每個文明都相信對方一定危險，咁所有文明都會選擇攻擊，結果反而製造咗本來可以避免嘅戰爭。

第四，呢個理論忽略咗價值觀可以變。文明未必永遠只追求生存，亦可能重視知識、道德、合作，甚至和平共存 。如果一開始就假設所有文明都必然充滿敵意，呢個假設本身可能就限制咗我哋對宇宙文明多樣性嘅理解。

《黑暗森林法則》雖然能夠解釋點解人類一直未發現外星文明，但過度依賴「科技決定論」，假設宇宙長期維持固定競爭狀態，亦將資源競爭過分簡化。相比之下，學者提出「適應性平衡理論」（Adaptive Equilibrium Theory），認為文明嘅科技、策略同合作模式會不斷演化，因此唔同文明有可能透過多種共存方式和平發展，而唔一定走向互相毀滅 。

睇埋

• 外星生命
• 生命起源
• 天體生物學