dacit

Dacit ze Zjednoćenych statow Ameriki

Dacit je wulkaniska magmatiska kamjenizna, kotraž wobsteji přewažnje ze žiwca, křemjenja a błyšćinki. Ze žiwcow přewažuje běły plagioklas nad kaliumowym žiwcom. Křemjeń ma zwjetša ćmowu barbu (šěru hač šěromódru). Ćmowa błyšćinka (biotit) je přeco zastupjena a swětła (muskovit) móže być přitomna. Z druhich mineralow móža amfibol, pyrokseny, apatit, hematit abo magnetit zastupjene być. Dacit ma zwjetša porfyrisku strukturu a wšelakore barby. Samsnu zestawu matej granodiorit (hłuboka magmatiska kamjenizna) a granodioritowy porfyr (žiłowa magmatiska kamjenizna). Dacit je jara podobny ryolitej. Wužiwa so jako twarski kamjeń. Mjeno pochadźa wot historiskeho teritorija Dakija.

Rozšěrjenje

Dacit je rozšěrjeny we wulkanisce aktiwnych kónčinach, na přikład w Južnej Americe, Japanskej, na Filipinach abo w Islandskej. W Europje wustupuje tež w Rumunskej, Słowakskej, Šotiskej abo Italskej. W Němskej přewodźa druhe wulkaniske kamjenizny a namaka so na přikład w Rudnych horinach.

Literatura

• Arnošt Dudek, Miroslav Malkovský, Miloš Suk: Atlas hornin. 2. nakład. Academia, Praha 1984, str. 312. 

Wotkaz

 Commons: dacit – Zběrka wobrazow, widejow a awdiodatajow